Avropa Yeniyetmələr üçün İnformatika Olimpiadası (EJOI)

EJOİ (European Junior Olympiad in Informatics) — Avropa ölkələrinin yeniyetmə şagirdləri üçün təşkil olunan beynəlxalq informatika olimpiadasıdır. Bu yarış gənc istedadların erkən yaşlardan alqoritmik düşüncə və proqramlaşdırma bacarıqlarını inkişaf etdirmək məqsədi daşıyır.

EJOİ ilk dəfə 2017-ci ildə Bolqarıstanda keçirilmişdir. Olimpiada modeli Beynəlxalq İnformatika Olimpiadasına (IOI) əsaslanır. Yarış iki rəsmi yarış günündən ibarət olur və iştirakçılar fərdi şəkildə proqramlaşdırma tapşırıqlarını həll edirlər.

Olimpiadada əsasən Avropa ölkələrinin komandaları iştirak edir. Hər bir ölkə maksimum dörd yeniyetmə iştirakçı və rəhbərlərdən ibarət komanda ilə təmsil olunur. İştirakçılar üçün yaş həddi adətən 15 yaşadək müəyyən edilir.

Yarışın əsas məqsədləri gənclərin informatika sahəsinə marağını artırmaq, erkən yaşlarda beynəlxalq dostluqları təşviq etmək və yeni nəsil proqramçıların inkişafına dəstək verməkdir.

EJOİ həm də müxtəlif ölkələrdən gələn iştirakçılar üçün mədəniyyət və təcrübə mübadiləsi imkanı yaradan əhəmiyyətli bir platforma hesab olunur. Yarışla yanaşı sosial və əyləncəli tədbirlər də keçirilir.

Azərbaycan və EJOI

Azərbaycan Respublikası EJOI-də ilk dəfə 2017-ci ildə iştirak etmişdir. Gənc azərbaycanlı iştirakçılar qısa müddət ərzində informatika sahəsində öz bacarıqlarını nümayiş etdirərək müxtəlif nailiyyətlər əldə etmişdir. İndiyədək ölkəmiz EJOI-də 4 gümüş və 8 bürünc medal qazanaraq uğurla təmsil olunmuşdur.

Ətraflı məlumat əldə etmək üçün rəsmi sayta baxa bilərsiniz.